Vinnar av Årets teamwork IDC

Samarbeidet viser korleis tre selskap kan spele kvarandre gode. Oceanize sorterer, kvernar og vaskar PP- og PE-tau frå havbruk og fiskeri. Hjå Pla-Mek® blir granulatet brukt som råstoff i produksjonen av injeksjonsrøyr til CT-bolten. Bergsikringsavdelinga i Saferoad Vik Ørsta brukar røra i produksjon av produktet CT-bolt. Slik får tau som elles ville blitt avfall, eit nytt og langt liv inne i fjellet. Gevinsten kan målast: Berre i 2024 gav den resirkulerte plasten frå Oceanize 183 tonn lågare CO2-utslepp, ifølgje Energiråd AS.

–Det er stas at det blir sett fokus på samarbeid som dette, for mykje av det viktigaste arbeidet skjer mellom selskapa og ikkje berre inne i kvart av dei. Vi er avhengige av å ha gode samarbeidspartnarar som kjenner oss godt og forstår våre og kundane sine behov, seier produktsjef for bergsikring Eirik Romestrand.

Prisen «Årets teamwork» heidrar dei som bygg sterke team, sameinar ulike perspektiv og kompetanse og let samarbeid stå i sentrum for godt design

Pla-Mek® og Saferoad Vik Ørsta har jobba saman om produktutvikling i fleire tiår. For eitt år sidan tok dei også steget vidare og byrja å samarbeide om marknadsføring. Med andre ord er det samarbeid og teamwork på fleire nivå i bedriftene.

Prisen viser at berekraft og kvalitet kan gå hand i hand. Krava til lågare klimaavtrykk blir stadig viktigare i anbod. Då er det avgjerande å ha lokale partnarar som held høg kvalitet.