Nominerte til Årets teamwork

Samarbeidet viser korleis tre selskap kan spele kvarandre gode. Oceanize sorterer, kvernar og vaskar PP- og PE-tau frå havbruk og fiskeri. Plasten blir smelta om til granulat, og kvaliteten blir testa i laboratoriet. Hjå Pla-Mek® blir granulatet brukt som råstoff i produksjonen av injeksjonsrøyr til CT-bolten. Materialet blir bearbeidd i ein ekstruder og vidareforedla til tekniske plastkomponentar.

Saferoad Vik Ørsta set saman røyra med kamstål frå Mo i Rana, etter at det er varmforsinka og lakka i produksjonen i Ørsta. Deretter blir bolten pakka og send til tunnelprosjekt. Slik får tau som elles ville blitt avfall, eit nytt og langt liv inne i fjellet. Gevinsten kan målast: Berre i 2024 gav den resirkulerte plasten frå Oceanize 183 tonn lågare CO2-utslepp, ifølgje Energiråd AS. Heile verdikjeda har kvalitet, effektivitet og berekraft i fokus.

– Vi er stolte av å vere nominerte saman med Saferoad Vik Ørsta og Oceanize. Samarbeidet viser kva som er mogleg når vi kjenner kvarandre godt, har tillit til kvarandre og tør å tenkje nytt. Tau som før var avfall, er i dag ein del av ein bolt som skal sikre tunnelar i mange tiår, seier marknadssjef Sonja Øye i Pla-Mek®.

Pla-Mek® og Saferoad Vik Ørsta har jobba saman om produktutvikling i fleire tiår, og for eitt år sidan tok dei også steget vidare ved å samarbeide på marknadsfronten. Etter initiativ og koordinering frå Pla-Mek® si side blei det utarbeid kampanjemateriell på tvers av dei tre selskapa som fremja det gode produktet til marknaden. Med andre ord er det samarbeid og teamwork på fleire nivå i bedriftene.

For Saferoad Vik Ørsta viser nominasjonen at berekraft og kvalitet kan gå hand i hand. Krava til lågare klimaavtrykk blir stadig viktigare i anbod. Då er det avgjerande å ha lokale partnarar som held høg kvalitet.